廚

Food Channel有個節目叫「cook like a chef」，做廚師的P很喜歡看。上星期五晚，同P食飯，食食下佢突然話想番屋企，因為趕住睇「煮撚到個廚咁」。我話你痴撚左線呀，煮撚到個廚咁？哦，原來佢想講烹飪節目「cook like a chef」。

我同P講，你爛口成咁，就快變成中國Gordon Ramsay。佢笑笑口話，係香港，特別係廚房佬，人人爛口，分分鐘運用粗口技倆，比運用鑊鏟技倆要高幾班。「鬼佬只係識fuck哩fuck去，」P忍唔住挑左一聲：「無哩creativity」。

席間P借了我一本有趣的書，叫「五十個名廚的最後晚餐」(My Last Supper: 50 Great Chefs and Their Final Meals)。P讀番書出身，係日不落帝國讀culinary school，點知佢伯爺一句「子承父業」，就生鉤鉤咁響英國拉左P番家族生意幫手。

P話中文烹飪書寫得太膚淺，一係就錯漏百出，一係就似閂埋房門打飛機咁，自己搞俾自己睇，反而英文書寫得好有紋路。鬼佬重視實踐，講究原則，人地當烹飪係一門craftsmanship，一切菜餚都有其傳統，一步一履亦有所規範。中國人成日擔心「教識徒弟無師父」，故此都收起一式半招，留為已用，加上欠缺系統思維，試問又點會將技巧薪火相傳，又或者有條不紊咁記錄低？

Jacques Pépin係一次訪問度話，廚師係匠，自己一直都唔覺得自己係藝術家。因為，作為藝術家，作品可以時好時壞，但作為廚匠，對象係顧客，保持水準乃主要責任，若果顧客覺得好食，就會根據味覺，再來幫襯。好廚師一定要keep到一致水平，不能失守，依個先係good chef同bad chef既分別。

我話P你講得咁勁，不如搵次煮餐請我食下，「挑，做廚咁煩，」P揮揮手叫埋單：「都係轉做收銀好喇。」